LINGUA NAPOLETANA / “Comme se chiamma”, una poesia di Roberto D’Ajello

La confusione dei nomi che scivolano via dalla memoria, una scena quasi archetipica di una coppia di anziani immortalata in uno scambio di ricordi, persone, relazioni, professioni, volti di cui ogni volta sfugge il nome. Un bozzetto con un pizzico di assurdo delineato con arguta ironia da Roberto D’Ajello, poeta e traduttore, nella sua poesia “Comme se chiamma”, che abbiamo il piacere e l’onore di pubblicare su Identità Insorgenti, giornale con il quale il grande traduttore ha accettato da questo numero di collaborare. Roberto D’Ajello è autore di numerose raccolte di poesie, tra cui Sustanzialmente io songo n’ommo allero e Limerick napulitane, e vincitore del Premio d’eccellenza 2015 al Groiler Club, NY, per la sua traduzione in napoletano di Alice nel Paese delle Meraviglie.

Comme se chiamma

– Stammatina â piscina aggio ncuntrato…
– Chi hê ncuntrato? – Giesù, comme se chiamma?…
coso—l’amico mio ca s’è spusato…
’a figlia ’e… cosa…avimmo vist’ ’a mamma

nu paro ’e juorne fa, cu… Annamaria.
– Ma addò l’aîmmo ncuntrata? a ’o risturante?
– Qua’ risturante, steva ’mmiez’ ’a via
cu ll’avvocato… chill’ommo scucciante…

– Ma quale via? Nun m’arricordo ’e niente!
– Comme! ‘a strata addò vénnenno ’e giurnale…
chillu vico che scenne, chino ’e ggente…
comme se chiamma? forze San Pascale?

– Ma mo chistu Pascale che ce azzecca?!
nun stévamo parlanno ’e Annamaria?
– Tu nun capisce maie na ficusecca:
Pascale è sulo ’o nomme ’e chella via!

– Comunque sia, tu me stive cuntanno
’e chillo c’hê ncuntrato stammatina,
chill’amico ca se steva abbaggnanno
nizieme cu tte ’int’a ll’acqua d’ ’a piscina.

Se pô sape’ chi è, comme se chiamma
si ’o canosco pur’io, che fa ’e mestiere…
e comm’è ca sapimmo pure ’a mamma?
– Ma staie parlanno ’e stammatina o ’e aiere?

– Ma comme! aiere?… te sî nzallanuto?!
mo mmo m’hê ditto ’o fatto d’ ’a piscina!
Siénteme a mme, aîmm’a cerca’ l’aiuto
’e uno ca te dà na mmerecina

ca te sceta ’a cervella e te pulezza
’e rutelle arruzute d’ ’a memoria.
Tu sî giovine ancora, e che schifezza!
primma ’e dimane ha dda ferni’ ’sta storia!

Senza perdere tiempo, ampressa ampressa,
telefunammo a chillu prufessore…
ca se spusaie… chella prufessuressa…
amica d’’a mugliera ’e Salvatore…

– ’O miedeco d’ ’e pazze?! – Eh! ’o spicialista
d’ ’e ccervelle d’ ’a gente, m’hê capito?
teneva na cainata farmacista…
c’hêva spusato… ’a sora d’’o marito…

– L’ âmm’ ’a telefuna’ stasera stessa,
accussì nce facimmo nu prugramma.
Piglia l’elenco, cercalo, fa’ ampressa!
– Comme se chiamma, ma comme se chiamma?!

Roberto D’Ajello

Anacapri, 10 agosto 2016

Teresa Apicella

Giornalista Pubblicista. Entra nel collettivo perché decide di fare dentro Identità insorgenti il suo stage universitario resta poi nel giornale, per scrivere di lingua napoletana. È co-ideatrice del  video-progetto “L’eternità di Partenope” dedicato a Matilde Serao, tradotta in napoletano per la prima volta. Laureata in lettere classiche e poi in linguistica, appassionata di antropologia culturale, di cose sommerse e cose che rischiano di scomparire. Amante delle differenze, a patto che attraverso di esse si riveli la ragione profonda per cui siamo tutti uguali. “Cercare e saper riconoscere chi e cosa, in mezzo all’inferno, non è inferno, e farlo durare, dargli spazio.” (Italo Calvino, Le città invisibili).